Д е р е к т е р |
Әдебиет майталмандары |
2006-12-05: Егемен қазақстан Кекілбаев кеңістігі Әбіш
Кекілбаев – заманымыздың бір заңғар тұлғасы.
Кекілбаев туралы сөз айту кімге болса да оңайға түсе қоймас.
Өйткені, Кекілбаевтың өзі бір әлем. Шүкір, қазір
сол ғажайып әлемді зерттеп, оның ерекшеліктеріне шұқшия
үңіліп, Кекілбаевтың шығармашылық өнері
туралы жазылған мақалалар да бірнеше томға жетерлік. Әбекеңнің
шығармашылық еңбегі туралы пікір білдіріп, еңбек жазғысы
келген әрбір адам бұрынғы айтылған сөз, жазылған
дүниелерді қайталағысы келмей, тың жол тапқысы
келетіні де табиғилық. Оған қоса Кекілбаевтың өзінің
әлем, қазақ тарихының көрнекті адамдары,
замандастары, осы заманның, біздің қоғамның құбылыстары,
бағыт-бағдары туралы толып жатқан ой толғаулары да,
публицистикалық шығармалары да елге белгілі. Кекілбаевтай
шешендікпен сөйлеп, Кекілбаевтың шеберлігіндей жазу – тек сол Әбекеңнің
үлесіне тиген жеке тұлғалық ерекше қасиет. Кекілбаевты
біздің қазақ оқушысы, қазақ қоғамы
ең алдымен ақын, жазушы ретінде таныды. Кекілбаев толғанса
– роман, көсілсе көсемсөз туады. Өндіріп, өнімді
жазатын суреткер. Туындыларының көрінісі көркемдігімен,
кейіпкер бейнелері шежірелі шешендігімен, оқиғасы тарихи
деректілігімен қатар өріліп, астарлы сөз, ой дариясының
тұңғиығына шомылдырады. Менің қатарым оның
әдебиет сыншысы ретінде қарымды еңбек еткенін де біледі.
Кекілбаевтың өзін көрмей, білмей тұрғанда оның
әдеби сын мақалаларын оқитынбыз. Әбіш Кекілбаевтың
әдеби шығармалары, әдебиет туралы өте зерделі сын мақалалары
сол кездегі “Лениншіл жас” (бүгінгі “Жас Алаш”), “Қазақ әдебиеті”
газеттерінде, “Жұлдыз” журналында жарық көре қалса,
жібермей оқып, қаламгердің сондай білімгерлігіне,
білгіштігіне тәнті болып, таң қалып жүретін едік. Жазғандарына
қарап, жазушының жас шамасы сол Ғабит Мүсіреповтердің
қатарындағы адам шығар деп ойлайтынбыз. Оның сол
кезде жиырма бес пен отыздың арасындағы жігіт екенін де кейін
білдік. Сын мақалаларымен қатар Кекілбаевтың көптеген
әдеби шығармалары дүниеге келе бастағанда көптеген
оқушылар іздегенін тауып, күткені келгендей қуанғаны
да есімізде. “Күй”, “Шыңырау”, “Ханша дария хикаясы” деген Әбекеңнің
сол кездегі шығармалары оқушыларының дүниетанымына жаңа
бір рухани серпіліс берген-ді. Тақауда ғана жарыққа
шыққан Әбекеңнің 25 жасында жазған “Күй”
повесі бойынша түсірілген “Кек” фильмін бүгінгі көрермендер
де түсініп, жылы қабылдады. Әбекеңнің
қоғамдағы феномені – оның толассыз ізденгіштігі мен
зерттеушілігі, сол қазынасын жиылған жүк құсатып
тең-тең етіп қоймай, түйдек-түйдегімен оқушысына,
еліне, жұртына тасқындатып төгіп жатуында. Сондықтан
да әдебиет сүйер қауым Әбекең не жазды екен деп
күтіп жүреді, шыққан дүниесін іздеп тауып, оқып
жүреді. Әбекең оқушысын жерітпеген, ренжітпеген, көңілін
қалдырмаған, қаламы демікпеген, шабыты сарқылмаған
жазушы, қоғамның сергек сарапшысы. Асқар Сүлейменов
өзінің бір мақаласында былай деп жазыпты: “Кекілбаев дарыны
мейлінше ғибратты дарын. Оның кеңістігінің өзінен
ұғымтал көкірекпен жіті көз адуын өнердің
мінезін көреді”. (Ә.Кекілбайұлы, 1-том, 387-бет). Оның
“Аңыздың ақыры”, “Үркер”, “Елең-алаң”
тарихи романдары тек тарихи шежіре емес, бүгінгі қоғам үрдісімен,
ұлт мүддесімен астасып, бостандық рухы мен өркениеттің
өшпес құндылықтарына ұмтылатын мінез тәрбиелерлік
қуатты шығармалар. Әбіш Кекілбаевтың қай қасиетін
сөз етсек те ең алдымен қазақ санасында оның әдебиет
сыншысы, шебер, көркем шығарма жазушылығы алғы кезекке
шығады. Әдебиетке бала кезінен мол дайындықпен келгені оның
терең шығармаларынан айқын көрінеді. Әдеттегідей
жасқана, имене әдебиеттің есігін ашқан жас өскін
емес, білімі толық, кемелі келісті, қаламы төселіп, дауысы
орныққан дарын иесі екендігі шүбәсіз, нық басқан
салмақтылықпен келді. Ол өзінің көркем сөз
зергерлігімен біздің рухани өмірімізді байытты, көзімізді
ашты, көкірегімізге ұлттық сенім, сана ұялатты. Жазушы
Әбіш Кекілбаевтың көркем шығармаларының қай-қайсысы
болсын оқушысын бей-жай қалдырған емес. Қоғамның
елеулі оқиғасы, құбылысы болып, еніп жатты. Өткен
ХХ ғасырдың 60-70-жылдары қазақ әдебиетінің
қайта өркендеу дәуірі болды десек қателесе қоймаспыз.
Кезінде, көзі тірісінде “Алыптар тобы” атанып, елдің, қоғамның
рухани көсемдеріндей болған Мұхтар Әуезов, Ғабит
Мүсірепов, Сәбит Мұқанов, Ғабиден Мұстафин
сынды әйгілі суреткерлердің ізін баса, өкшелес келген Жұбан
Молдағалиев, Сырбай Мәуленов, Тахауи Ахтанов, Әбдіжәміл
Нұрпейісов, Ілияс Есенберлин қазақ әдебиетін дамудың
жаңа кезеңіне көтерумен бірге қоғам қайраткерлері
ретінде танылды. Әдеби шығармалар үздіксіз сұранысқа
ие болып, қоғамның қозғаушы ірі күшіне
айналды. Әдебиеттің, әдебиет қайраткерлерінің қоғамда
мәртебесі артты, беделі өсіп, тұрақтанды. Адамдар
олардың зиялы сөз, саналы ойына құлақ асты.
Зейін қойды. Осы
тұста келіп қосылған жас толқынның екпіні де,
сарыны да, әуезі мен үні де ерекше қуатты еді. Олардың
өрнегі, қаламгерлігі, қоғам ісіне араласқан қайраткерлігі
де жаңа серпінге толы болды. Шоғыр жұлдыздар қатарындағы
Әнуар Әлімжанов, Олжас Сүлейменов, Шерхан Мұртаза, Әбіш
Кекілбаев, Сайын Мұратбековтің әрқайсысы бір ой мен
сөздің сәнін түзеген жасаулы керуендей әсер қалдыратын.
Оларға ілесе саясат сахнасына Фариза Оңғарсынова, Мұхтар
Шаханов, Нұрлан Оразалин көтерілді. Бұл
мақалада Әбекеңнің жазушылығына сараптама
жасау мақсатымыз емес. Сол жазушы еңбегінің қоғамға
қажет болғандығын, жаңа қоғамның,
жаңа мемлекеттің қалыптасуында Әбіш Кекілбаевтай
талғампаз білімдардың мемлекеттік саясат ісіне араласу қажеттілігі
сөз болмақ. Әбіш Кекілбаев осындай дарыны бөлек, сөзі
ерек жазушы болмаса мемлекет, қоғам ісіне, саясатқа дәл
бүгінгідей араласа алар ма еді? Әрине, бұл сұрақ. Әбіш
Кекілбаев туралы сөз айтуға талпынсақ – оның азаматтық
қызметінің кең ауқымдылығы мен тұтас тұлғасының
жан-жақты, көп салалығымен бетпе-бет келетініміз хақ.
Біразын айтып көрейік. Әбіш
Кекілбаев – жазушы. Әбіш
Кекілбаев – философ. Әбіш
Кекілбаев – тарихшы. Әбіш
Кекілбаев – аудармашы. Әбіш
Кекілбаев – шешен. Әбіш
Кекілбаев – шежіре. Әбіш
Кекілбаев – мәдениеттанушы. Әбіш
Кекілбаев – ғалым. Әбіш
Кекілбаев – публицист. Әбіш
Кекілбаев – өнертанушы. Әбіш
Кекілбаев – әлеуметтанушы. Әбіш
Кекілбаев – саясаттанушы. Әбіш
Кекілбаев – кітапхана. Әбіш
Кекілбаев – энциклопедия. Әбіш
Кекілбаев – гуманист. Әбіш
Кекілбаев – қайраткер. Осы
айтылған анықтамалардың әрқайсысын бір-бір
зерттеу мақалаға немесе тақырыптық лекцияға
арнаса да болар еді. Әбекеңнің
кез келген ортада, кез келген мінберден тауып сөйлеп, көңілдің
хошын көтеріп кететіні туралы оны сүйсініп тыңдайтын адамдар
арасында аңызға парапар әңгімелер айтылады. Бірде,
Әбекең Еуразия университетінде жаһандану құбылысы
туралы лекция оқыды. Үлкен зал толы студенттер мен оқытушы,
профессорлар, ғалымдар сілтідей тынып, қызығушылықпен
тыңдады. Лекция біткен соң тыңдаушылар жұмыла
ризашылықпен қол соқты. Соңыра, тіл білімінің
профессоры Мырзатай Серғалиев Әбекеңнің лекциясына өте
жоғары баға беріп, орыс мәдениетінің көрнекті қайраткері
А.Луначарскийді еске алып: “Біздің Әбекең қажет болса
– сайтан туралы да бір сағаттық лекция оқитын шығар”,
– дегенде залдағылар серпіліп, ұзақ қол шапалақтады.
Шынында да кезінде ғұлама Мұхтар Әуезовтің
лекцияларынан нәр алған Әбіш Кекілбаев – ғасырлар
тереңінен келе жатқан даналардың заңды жалғасы,
жаңа заман зиялыларының көш бастаушысы десек, артық
айтқандық болмас. Әбекеңнің
естен кетпейтін тағы бір тарихи танымдық, шежірелік лекциялары
1992 жылдың жазында Маңғыстау жерінде өткізіліп еді. Әбекең
ол кезде Жоғарғы Кеңестің Мәдениет, тарихи
ескерткіштерді қорғау жөніндегі комитетінің төрағасы.
Комитеттің көшпелі мәжілісі өтті. Комитет мәжілісіне
50-60 адам ғалымдар, өнер, мәдениет қайраткерлері,
депутаттар, жазушылар, министрлер, баспасөз қызметкерлері қатынасты.
Аңыз бен тарихқа толы Маңғыстаудың Үстірті
мен Ойпаңында бір жұма жер аралап жүріп, Әбіштің
лекцияларын тыңдадық. Бұл – теңдесі жоқ тарих,
ел тану, жер танудың ғажап сабақтары болды. Әбекең
төгілді. Әсерімізді әлі күнге сөзбен айтып
жеткізе алмаспыз. Әбекеңнің Ұлы даладағы
лекциялары туралы Герольд Бельгер тамаша очерктер жазды. Өзі де ғұлама
ғалым, Маңғыстауды аз білмейтін академик, марқұм
Зейнолла Қабдолов риза болғанын “Мен Әбішті оқыттым
деп айтуға бата алмай тұрмын, ойпырай, бұл не деген
білім?”, – деп таңғалғанын жасыра алмады. Мырзатай
Жолдасбеков: “Маңғыстауда ежелден 362 әулие бар еді, 363-ші
әулие Әбіш Кекілбаев шығар”, – деді. Ол сөздер Әбекеңнің
біліміне риза болғандықтан айтылған сөздер. Міне,
тұла бойы телегей-теңіз дарын мен талантқа толы
интеллектуалдық құбылыстың қыр-сырына терең
үңілместен-ақ, оның жазғандарын оқып, толғамдарына
тоқталып, сәті түссе дидарласқан адамның
сезінетіні. Яғни, қазақ тарихының кесек бітімінің
бірі Әбіш Кекілбаев еңбегінің әр саласы тарау-тарау
зерттеулер мен құлаш-құлаш мақалаларға
арқау боларлық. Әбіш
Кекілбаевтың болмысына ден қойсақ, жай көзге, адами
дидарласуға ғана қарапайым көрінуі мүмкін. Бұл
– әрине, алдамшы сезім. Шын мәнінде Әбекең кез келген
шығармашыл тұлға ретінде күрделінің күрделісі.
Оның қарапайым көрінетіні – тірі пендеге арамдығы
мен залалы, тәкаппарлығы мен менменсуі, кердеңі мен
шіренуі жоқ, Жаратушының бере салған дархан жүрек,
жомарт пейіл қасиетінен. Залал түгілі тіпті өзі жақтыра
бермейтін жұғымсыз, сырғанақ, жылпос, берекесіз адам
туралы да жаңсақ пікір, жаман сөз айтып көрмеген
ерекше төзімшіл даналығы Әбекеңнің тұлғасының
ірілігін айшықтап-ақ тұрады. Әбекең күй
таңдамайды. Жазғысы келсе Эрнст Хэмингуейдің түнгі
бардың биік үстелінде тұрып жазатынындай кез келген жерде
отырып, жүріп жаза береді. “Шандоздың” көп тарауларын
Алтайдың көкмайса сұлу шатқалында біз атқа
мініп, сауық, сайран, серуен құрып жүргенде, сол
рахаттан өзін тежеп, Махамбетпен “оңаша қалып”, тарих
беттерін қайта ақтарып, бұрқыратып жазды. Уақытына
өте мұқият. Кешікпейді, жинақы жүреді. Төңірегіне
өте қырағы. Тауда жүрсе – қиядағыны,
далада жүрсе – көкжиектегіні көреді. Ешнәрсені ұмытпайды.
Зердесі мықты. Уәде берсе орындайды, сөзіне берік – рыцарь.
Қырынан қарасаң, дүрдік еріндері Қажымұқанның
суретін еске түсіретін палуан пішіндес Әбекеңнің адам
таңғалатындай нәзік сезімталдығы мен кейде жоқтан
өзгеге шыр-пыр болып мазасызданып қалатыны да болады. Шөл
мен аптапқа сыр бермес төзімді, Үстірттің қара
нарындай кейпінде арқаның құрық тимеген
асауындай тарпаңдық та, Алатаудың қарағай мүйізді
Арқарының маңғаздығы да менмұндалап тұрады.
Осының бәрі түп нағашысы – Қара Боқан мен
бағзы бабасы – Қожаназардан өрбіп келе жатқан өшпес
мұра, бай мінезі болса, шешендігі мен тапқырлығы, зиялылығы
мен дархандығы – көзіміз көріп, мейір шапағатынан ғибрат
алған ұлы ана – Айсәуледен дарыған асыл қасиеттері
дерсің. “Жазушыға саясат не керек?” деген де сөз
айтылды. Бірақ жазушы қоғамның алдыңғы қатарлы
озық ойшылы бола отырып, қоғамның әртүрлі
құбылыстарын тек сырттан бақылаушы емес, оған өз
бағасын беріп, ұсыныс-пікірлерімен де тікелей араласарлық мүмкіндіктерін
үнемі ескере бермейміз. Кекілбаев өткен заманда да партия қызметіне
шақырылды. Бірақ, партияның солақай қолшоқпарына
ешқашан айналған емес. Керісінше, әсіресе әдебиет,
мәдениетке партия саясатының әділ қалыптасуына оң
ықпалын тигізді. Өйткені, Әбекең өзінің
табиғи шыншыл, адал, әділ болмысын сақтап қана қоймай,
қоғамдағы әртүрлі оқиға, қарым-қатынасқа
да азаматтықтың ар тұрғысынан қарай білді. Біз
кейде бүгінгі күннің биігінен өткен заманымыздың
қыр-сырына үңіліп жатпастан, бәрін “бір қауызға”
сыйғызып, “бір сыпырғышпен” сыпырып, баға беріп жататынымыз
бар. Сол тоталитарлық жүйенің кезінде де әртүрлі
лауазымды қызметтерде жүріп, ұлтымыздың ұлттық
мәдениет, әдебиет, ұлттық мұра, салт-дәстүрлерінің
сақталуына сақшы болған ардақты адамдарымыз да
баршылық. Әбекең ол адамдардың өмірі мен қызметін,
ұлттық ұстанымдары мен дүниетанымын жақсы
біледі, олар туралы ауыз тұшытып айтып та жүреді. Әбекеңнің
сондай ыждаһатпен айтатын адамдарының қатарында Нұртас
Оңдасыновтың, Ілияс Омаровтың, Өзбекәлі Жәнібековтің
орындары бөлек. Олар сол кездерде партияның идеология саласының,
немесе үкімет басшысының қызметінде жүргендерін қазақтың
ұлттық мәдениетінің өркендеуіне жұмсағанын
тек шежіре түрінде ғана жинақтап қоймай, өзінің
қоғамдық, мемлекеттік қызметінде де үлгі
еткенге ұқсайды. Осы арыстардың қазақтың
тілін, әдебиетін, мәдениетін, ұлттық ерекшеліктерін мәртебелеу
жолындағы білімдарлық еңбектерін, саяси ұтқырлықтары
мен тапқырлықтарын нақты деректермен негіздеп, олардың
іс-әрекеттері туралы шабыты келген шақта төгілтіп әңгіме
айтады. Әбекең
өткен ғасырдың 70-80 жылдар аралығында мәдениет,
әдебиет, кино салаларында ұйымдастыру-шығармашылық қызметтерін
атқара жүріп, өзінің жазушылық кәсібін
алдыңғы қатарға қоя білді. Партияның
Орталық Комитетінің мәдениет бөлімінде әдебиет
секторының меңгерушілігіне Әбіш Кекілбаев жазушыларға
да, қоғамға да сөйлесе сөзі өтетін, қажет
кезінде басқарушы билікке олардың да талап, тілегін, сөзін өткізе
алатын беделді қаламгер, тәжірибелі саясаткер ретінде қызметке
шақырылды. Сол жылдарда бір-бірімізді түсінісіп, сырласып, ақылдасып
жүріп абыройлы қызмет атқардық. Әбекең
Орталық Комитеттен Мәдениет министрінің орынбасары қызметіне
жіберіліп, қысқа мерзімде қыруар істер атқара алды. Әрине,
ол лауазым шекпені Әбекеңнің иығына тарлау болғаны
да рас. Бірақ сол кезде жасақталып жатқан мемлекеттік
тарихи мұражай үшін, Түркістандағы Қожа Ахмет
Ясауи кесенесінің жөнделуі, басқа да тарихи ескерткіштерді
сақтап, жандандыру үшін Әбекеңнің сол салаға
келуі пайдалы болды. Соңыра Әбекең қайтадан Орталық
Комитетке ұлтаралық қатынастар бөлімінің
басшылық қызметіне шақырылды. Жаңа мемлекет тұсында да Әбекең
– депутат, Комитет төрағасы, Жоғарғы Кеңес Төрағасы,
Мемлекеттік хатшы, Сенат депутаты сияқты лауазымды қызметтерді
абыроймен атқарып келеді. Менің
пайымдауымша сол жылдарда да, қазіргі заманымызда да Әбекеңнің
саясатқа құлшынған құштарлығы бола қойған
жоқ. Әбекең өз бастамашылдығымен саясат іздеп
ұмтылмады. Саясатқа Әбіш Кекілбаев сияқты тұлға
қажет болды. Әбекеңнің ішкі дайындығы
жеткілікті болған соң, реті келгенде одан бас тартпады. Желкенді
қайыққа мінді. Желкеніне жел есті. Саясатта да өнердегідей
жолы болды. Бір жақсысы – саясаттың ықпыл-жықпыл
ойындарынан бойын аулақ ұстап, жеке даралығын сақтады.
Мұндай даралық түптеп келгенде тазалыққа тән.
Дәл қым-қуыт кезінде қиындау болғанымен,
кейбір ұсақ-түйектен ұтылыс болғанымен, түбі
бағаланады. Басқа марапаттарын айтпағанның өзінде
Әбекеңнің бірінші нөмірлі “Тұңғыш
Президент Нұрсұлтан Назарбаев” деген орденнің иегері болуы
да, сірә, жайдан жай емес шығар. Әбіш
Кекілбаев 1995 жылы “Егемен Қазақстан” газетіне берген бір сұхбатында
бұл туралы өзі былай деп түйіндейді: “Адамдар мен халықтардың
арасындағы жарастыққа қызмет ету – менің суреткерлік
те, азаматтық та парызым. ...Мен әдебиетші болмасам, саясатқа
келмес ем. Суреткер болмасам, күрескер де болмас ем. Бұрын
суреткер ретінде толғандырған мәселелер – мені азамат
ретінде де толғандырып жүрген мәселелер еді. Қиял арқылы
шешіп келген мәселелерге нақты өмірде тікелей атсалысуға
мүмкіндік туып тұрса, одан қалайша бой тартамын? Оның
үстіне, қай кезде де қаламгерлік еңбекті қоғамдық
қызметпен ұштастырып жүрген адаммын. Саясатқа
келгеніме өкінбеймін. Тауқыметі көп. Күндіз күлкіңді,
түнде ұйқыңды бұзатын тұстары да мол. Әлеуметтік
өмірдің талай шиеленісті додаларының ортасында жүруге
де тура келді”. (Әбіш Кекілбайұлы, Он екі томдық шығ.
жинағы. 9-том. 397-398 беттер). Кеңес
Одағының соңғы кезеңінде ұлттық
сананың жаңа сапалық сатыға көтерілу үдерісі
мейлінше өрістеп, ол туралы пікірталас бүкіл кеңістікте бұрын-соңды
болмаған сипат алды. 1922 жылғы қабылданған Одақтық
келісімді жаңарту, жаңғырту қажеттігі туды. Осының
төңірегінде Мәскеуде, одақтас республикаларда
пікірталастар басталды. Әртүрлі “дөңгелек үстелдер”,
жиналыстар жиіледі. Мәскеуге жиналған съездерде Балтық жағалауы,
Кавказ республикалары егемендік туралы әңгіме көтере
бастады. Әбекең Қазақстан делегациясының құрамында
осы айтыстардың көпшілігіне қатынасып, жұрт назарын
аудартатын тиянақты ұсыныс, әсерлі пікір айтып жүрді.
Сол кезең туралы Әбекең өзі былай деп еске алады: “Елдегі
әлеуметтік оянуға 1989 жылғы көктемде өткен
КСРО Жоғарғы Кеңесінің сайлауы жаңа қарқын
қосты. Демократиялық оппозиция 1922 жылы жасалған Одақтық
шартты жаңалау мәселесін көтерді. Бұл реформалар ағысын
ұлттық қатынастар арнасына қарай бұрды. Сол жылғы
мамырда Литва, шілдеде Латвия, қыркүйекте Әзірбайжан
мемлекеттік егемендіктері туралы декларациялар қабылдады. Бұдан
шошынған СОКП мен КСРО Жоғарғы Кеңесінің
Президиумы Литва, Латвия, Әзірбайжан мәлімдемелерін танудан бас
тартты. Оларды
одан әрі шошыта түскілері келгендей 1990 жыл басталмай жатып,
Литва тәуелсіздік жариялады. Іле-шала оған Латвия мен Эстония қосылды.
Бұл үдеріс осымен тынар ма екен, жоқ одан әрі жалғасар
ма екен деп тұрғанда, Ресей Федерациясы осы алуандас мәлімдеме
жасады. Оған басқа республикалар қосылды. Сол жылғы
25 қазанда біздің Жоғарғы Кеңесіміз Егемендік
декларациясын қабылдады. Декларацияны қабылдау үшін одақтас
республикалардың басым көпшілігінің мәлімдеме қабылдауын
тосуға тура келді. Өйткені, алдыңғы жылғы есеп
алуда қазақтар әлі тұрғындар санының 40
пайызын құрамайтын. Басқа ұлт өкілдері өз
тарихи отандарында жарияланып жатқан егемендіктің Қазақстанда
да жариялануы тарихи әділеттілік боларын сонда ғана түсінді.
Бұл құжат орталық алдында заңды түрде
талаптар қоюға мүмкіндіктер берді. Орталық
пен республикалар арасында жаңа құқықтық
ілік пайда болды. “Одақтық заңның ба, республикалық
заңдардың ба – қайсысының күші басым деген
таластар туды”. (Ә.Кекілбайұлы. Ұлтты ұлы мұрат
алға жетелейді. “Егемен Қазақстан”, 7 қараша, 2006
ж.). Міне, осы таластардың қайнаған ортасында полемист Әбекең
жүрді. Жай жүрген жоқ, қазақтың ұлттық
мүддесін өткізіп, дәлелдеп, қорғап, ұтып
жүрді. Халық оны сол үшін де қадірлейді, сенеді. Сол
жылдары тек орталық, немесе сырт елдерде ғана емес, ұлттық
мүддені өз ішімізде, республиканың ішкі саясатында нәтижелі
жүргізе білу маңыздылығы кезек күттірмейтін жағдайда
тұрды. Ұзақ жылдар тұтасып, қатып тұрған
ауыр жүйе сыр беріп ыдырай бастағанда салмақ ең
алдымен ұлтаралық, ұлттық қатынастарға түсті.
Саясиландырылған жалаң ұрандар қоғамның
сезімтал қан тамырларын жалаңаштады. Ресейдің
кейбір саяси күштері тарапынан “одақтас республикалардағы
орыстардың жағдайын құтқару” ұранын
жалындатып қаулатты. Бастапқы кезде мұндай әрекеттердің
көпшілік сезіміне әсер еткені де рас. Тіпті ұлттық,
тілдік, экономикалық жағдайлары жоғары дәрежеде қамтамасыз
етілген кейбір топтар осы Қазақстанда бәрінен қағажу
көріп жүргендей сезінгендері де рас. 90-шы жылдардың басы
экономиканың құлдырап, тұрмыстың барынша төмендеуімен
ерекшеленеді. Сондай-ақ қоғамдағы қайшылықтар
шиеленісіп, саяси ауаның қызуы көтеріліп, ыстығы күшейіп-ақ
тұрды. Әсіресе қазақ тілінің жағдайы, ономастика
мәселелері, ұлттық тарих, мәдениет тағдыры,
толып жатқан әлеуметтік кемшіліктер саяси топтардың қолына
жалау, тіліне тиек болып, дау-талас жайлап, саяси қиқу сары
желдей ысқырып, ешкім ешкімді тыңдай алмаған да бір кездер
болды. Әбіш
Кекілбаевтың саяси-қоғамдық белсенділігінің
артуы оның сол кездегі Жоғарғы Кеңестің
депутаттық қызметімен байланысты болды. Еліміздің
тұңғыш Президенті Нұрсұлтан Назарбаев та сол
жылдары Жоғарғы Кеңес депутаттарымен тығыз, өте
тиімді жұмыс жасай білді. Олардың көпшілігімен тікелей
пікірлесіп, ой бөлісіп отырды. Жанына жақын тартып, сенім
білдірді, көтермелеп, қолдау көрсетті. Жаңа деңгейге
көтерілуіне ықпал етті. Президенттің құқықтық
саясатының кеңістігін қалыптастыруға Салық
Зиманов, Қаратай Тұрысов, Өмірбек Жолдасбеков, Әбіш
Кекілбаев, Әнуар Әлімжанов, Сауық Тәкежанов, Сұлтан
Сартаев, Шерхан Мұртаза, Мұрат Әуезов, Нұрлан
Оразалин сияқты ұлтжанды, ұлт мүддесіне шын жанашыр ғалымдар,
жазушылар топтасты. 1990
жылғы сайланған Жоғарғы Кеңес депутаттарының
үлесіне еліміздің егемендігі туралы тұңғыш
Декларация, бір жылдан кейін мемлекеттік Тәуелсіздік туралы, тілдер
туралы заңдар, тәуелсіз елдің тұңғыш
Конституциясын қабылдау бақыты тиді. Міне, осы тағдырлы
шешімдерді талқылау, қабылдау барысының ең кереғар
пікірталас додасының дәл ортасында Әбіш Кекілбаевтың
нанымды деректері мен ұтымды, өтімді сөздері депутаттарды
тек ымыраға келтіріп, бір ауыздан дауыс беруге жұмылдырып қана
қоймай, Жоғарғы Кеңестей мемлекет институтының
мәртебесін, беделін халық алдында көтеріп отырды.
Пікірталас әбден шиеленіскен тұста Кекілбаев сөзге
араласып, талқыланып жатқан мәселені дауға емес, дәйекті
дәлел, сарабдал ой тастап, қайшылықты – бірыңғайлыққа,
таласты – татулыққа айналдыра алатын. Коммунистік партияның
басқарушы беделі төмендеп, Кеңес Одағы күйзелу
мен күйреудің арасында тұрған шақта, республика
жұртшылығы ішкі бірлікті көрсетіп, 1991 жылдың 1
желтоқсанында бүкілхалықтық Президент сайлауына жұмылып,
еліміздің Тұңғыш Президентін сайладық. Бұл
біздің өміріміздегі, қоғамымыздағы аса ірі, әрі
тарихи оқиға болды. Халықтың рухы мен көңіл-күйі
көтерілді. Тұңғыш рет Президентті ұлықтау
(инаугурация) рәсімі өткізілді. Президент Қазақстан
халқына ант берді. Депутаттар, зиялылар атынан Әбіш Кекілбаев
тереңнен толғап, бүгінге теңеп, болашаққа
меңзеп әсерлі, шұрайлы сөз сөйледі. Халықтың
көкейіндегісін айтты. Президент
Нұрсұлтан Назарбаев мемлекеттік құрылымдар мен
жауыннан кейін қаптаған саңырауқұлақтай
саяси партиялардың, саяси топтардың бастарын біріктіріп, ең
басты құндылық – ұлтаралық өзара түсіністік
пен сыйласымдылық қағидасын тұрақтандырудың
маңыздылығына назар аударды. Қоғамдағы, ел арасындағы
тыныштықты, тұрақтылықты қамтамасыз етпей, ешқандай
да экономикалық, саяси реформалар жүргізу мүмкін еместігі
халыққа дамылсыз түсіндірілді. Қоғам жағдайының
жақсаруы немесе керісінше болуы халықтың өз қолында
екендігі де жүйелі түрде түсіндірілді. Елбасы өзінде
бар билік пен мүмкіндікті қоғаммен, халықпен тығыз
ақпараттық қарым-қатынаста болып, кеңесуге, қоғамдық
пікірмен санаса отырып, қажетін алып, терісін дәлелді түрде
жоққа шығарып, мемлекеттік тиімді саясат жүргізуге
сауаттылықпен пайдаланды. Президент осындай рухани жұтаң
кездің өзінде халықпен кеңесіп, қоғамдық
пікірді сараптап отыру қажеттігін өте сезімталдықпен
шебер жүргізді. Еліміздің экономикалық даму стратегиясының
тұжырымдамасын жасау қолға алынды. Сондай-ақ қоғам
дамуының, рухани өркендеудің тұжырымдамасы да дәл
сол кезеңнің саяси ерекшеліктерін ескере отырып жасалды. Мұндай
күрделі құжаттардың негізгі мақсаты мемлекеттік
саясатты жүзеге асыру екені де белгілі. Әрине, бұл жерде
арнайы мемлекеттік жауапты, білікті қызметкерлердің, мемлекеттік
аппараттың қызметіне де көп нәрсе байланысты. Ал
олардың басы-қасында, Президенттің ақылдасар алқасында
Әбіш Кекілбаевтай білгір де орнықты, сабырлы, мінезге бай
мемлекетшіл, ұлтжанды және ел арасында беделі бар адамдардың
жүруін көпшілік жылы қабылдап, қоғам құптайтыны
анық. 1993
жылы Әбекең Президенттің жанында мемлекеттік кеңесші
деген қызметке тағайындалды. Сол кезде әйгілі жазушы Тахауи
Ахтанов бір кездескенде: “Осы Әбіштің қызметі не қызмет?”
- деп сұрап еді. Тахаң да ол жылдары тарихи шығармашылыққа
бет алып, тың дүниелер шығарып жүрген. “Таха, қазақтың
тарихы мен қызметін өзіңізден артық білеміз бе, Сіз қалай
ойлайсыз?” – деп сұрақты өзіне бұрып ем, ол кісі де
соны күткендей: “Дәл осы қызметі – Бұқар
жыраудың қызметі емес пе?” – дегені. Бұқар жыраудай
данагөй дүлдүлдің тарихта Абылайдың хандық
қайраткерлігімен қатар айтылуының өзі де қоғамның
қай кезде де рухани биіктікке ұмтылысын білдірсе керек. Тахаңның
айтып тұрғаны – Елбасының жанында ақыл-парасаты мол, әділ
де адал адамның жүргенін қалайтын зиялылар ойы еді. 1992-1993
жылдары қоғамның көңілінен шығатын көптеген
маңызды шаралар ұйымдастырылып, өткізілді. Ол кезде қоғамда
сұрақ көп болатын. Сұрақ әр кезде де
жеткілікті. Бірақ, бұрынғы саяси-экономикалық жүйе
құлап, экономикалық дағдарыс басталып, ондаған
жылдар бойы санамызбен сеніп келген дүниетанымдық құндылықтардан
бас тартып, қоғам дамуының беймәлім жолына түскенде
сұрақтың көп, жауаптың жеткіліксіз болатынын
бастан кешірдік. Бұрын-соңды болмаған жаңа, демократиялық,
құқықтық, ізгілікті, зайырлы мемлекет құрудың
бірінші кезеңі басталып, жүріп жатты. Қоғамда түсініксіз
жағдай көп. Ең бастысы – экономика күн сайын құлдырап,
шашылып, шегіне жетті. Қаржы жоқ. Жаппай жұмыссыздық
басталды. Зейнетақы, жалақы айлап төленбейтін болды. Әуел
баста оның себебін түсіне алмаған жұрт көшеге,
митингілерге шықты. Айқай, шу жеткілікті болды. Мемлекеттік қызметкерлер
осындай қиын жағдайда елмен сөйлесуге де, күн-түн
демей ізденіп, дүние жүзінің тәжірибесін жинақтап,
өркениетті заңдар жобаларын дайындауға міндетті болды. Бұл
– уақыт өткен сайын айтуға жеңіл мәселелер еді.
Қазақ халқының тарихын жаңғыртып, ұмыт
болған тарихи тұлғалардың есімдері жұрт назарына
ұсынылып, оларға ас берілді, ескерткіштер орнатылып, рухани өмірімізге,
әсіресе ұлттық патриотизм санасын қалыптастыруда
олардың қазақ үшін, жер үшін тігілген өмірі
мен ерлігі жария етілді. Президенттің қатынасуымен барлық
облыстардан мемлекеттік қызметкерлер, саяси партиялар, қоғамдық
қозғалыстар, баспасөз өкілдерінің басы қосылған
республикалық идеологиялық жиналыс өткізілді. Тарихтың,
қоғамның өз әлеуетін пайдалану сөз болды.
Осындай шаралардың құрамында бабалар рухына тағзым
ете отырып, бүгінгі ынтымағымызға ықпалын тигізетін
көпшілік бас қосуларын өткіздік. Ордабасыда 1726 жылы қазақтың
үш жүзінің басын қосқан Билер жиыны тәжірибесін
еске алып, көршілес отырған үш мемлекет – Қазақстан,
Өзбекстан, Қырғызстан президенттерінің кездесуі халықтың
рухын көтеріп, бірлігін нығайтып, жақсы нәтиже берді.
Жүз елу мыңнан астам халық жиналды. Президент Тутөбеге
көтеріліп, көк байрағымызды тікті. Халыққа
арнап сөз сөйледі. Мен ол кезде вице-премьер қызметінде болғандықтан,
осы маңызды шаруаны Әбекеңмен бірге қатар жүріп,
ақылдасып ұйымдастырдық. Әбекең шын мәнінде
таптырмайтын ақылшы, ақы сұрамайтын кеңесші. Ресейдің
кейбір саяси күштерінің итермелеуімен ұлтаралық қатынасқа
салмақ түсіріліп, казактар қозғалысы етек алып, әр
жерде сепараттық көзқарастар күшейген тұста Нұрсұлтан
Әбішұлының тапсырмасымен Әбіш Кекілбаевпен бірге бір
топ “дуалы ауыз” ғалымдарды ертіп Орталық, Солтүстік
облыстарды бірнеше рет араладық. Көптеген адамдармен кездестік.
Сұрақ-жауап пікіралысулар өткіздік. Әртүрлі үлкенді-кішілі
аудиторияларда тәуелсіздіктің, ұлттың, мемлекеттің
мұң-мұқтаждары, сұраныс, талаптары, алдағы
мақсаттар жайлы лекциялар оқыдық, кейбір жерлерде әртүрлі
наразылық митингілерге қатынасып, сабырға шақырып,
екпіндерін бәсеңдеттік. Осындай сапарлардың бірнеше мақсаттары
болатын. Біріншіден, жергілікті жерлерде ел-жұртпен дидарласу, әртүрлі
сұрақтарға жауап беру, елдің жағдайын білу.
Екіншіден, Президент, Үкімет, Жоғарғы Кеңес тарапынан
жүргізіліп жатқан саясатқа жұрттың көзқарасын
білу. Үшіншіден, халық пікірімен санаса отырып, қандай
шаралар ұйымдастыру, қандай заңдарды ең алдыңғы
кезекте дайындап, қабылдау қажеттігін білу. Бір жолда Президент
осындай талаптарға қосымша болашақта Астананы көшіру
мәселесін де зерттей келуді тапсырды. Ол кезде (1993 жыл) ұлтаралық
қатынас, тіл мәселелері күн сайын дүрліккен әңгімемен
көтеріліп жататын. Оған қосымша ішкі-сыртқы қоныс
аударушылар да жөңкіліп көшіп жатты. Солтүстік өңірлерден
қазақтар Алматы жаққа, орыстар Ресей жағалап,
немістер Германияға көш-керуен түзеген. Сол көші-қонның
себептерін де зерттедік. Петропавл қаласында жергілікті казактар
Коммунистік даңғылын Мағжан Жұмабаев атына ауыстырғанына
қарсы болып, наразылық митингісін ұйымдастырды. Жиналғандар
алдына Әбекең шығып сөйледі. Қазақтың
жерінде ешкім, ешқандай ұлт қысымшылық көрмегенін,
қайта қазақ тілі, мәдениеті, дәстүрі
шектеліп қалғанын ешкімнің шамына тимей ұғынықты
етіп жеткізді. Мағжанның кім екенін айтты. Митингішілер райынан қайтты.
Осы, тағы басқа сапарларымызда Президенттің Астананы көшіру
жөніндегі әлі жариялана қоймаған, ой түбінде
жатқан шешімінің дұрыстығына көзіміз тағы
да жетті. Келген соң Президенттің атына өз пікірімізді
айтып қызмет бабындағы записка жаздық. Сол
жылы атақты Орбұлақ шайқасының 350 жылдығы
— халқымызда, әсіресе жас ұрпақ санасында ұлттық
патриотизм сезімін күшейтуге тигізер ықпалы мол, танымдық мәні
зор шара ретінде өткізілді. Әбекең ел-жұрт қошеметіне
бөленіп, қазақ жауынгерлері шекара күзетінде ерлік көрсеткен
Белжайлауда тарихи танымдық тамаша баяндама жасады. Баяндаманың
тарихқа жүгінген өзектерін Әбекең өзіне тән
саясаткерлік, көсемсөздік шеберлігімен бүгінгі қазақ
қоғамының міндетімен аса зергерлікпен ұштастырып,
елді, жерді қорғаудың қасиеттілігіне тоқталды. Әбекеңнің
баяндамасын тыңдаған адам әлі күнге соны тамсанып
еске алады. Жалпы, Әбекең Жаркент өңіріне барған
сайын елмен арқа-жарқа шүйіркелесіп, көл-көсір
ниеті мен тілегін ағынан жарылып айтып, жұртты жадыратып
кетеді. Қазақ
көркемсурет өнерінің негізін қалаушы, қылқалам
шебері Әбілхан Қастеевтің, ұлы композитор, ағартушы,
қазақ музыка өнерінің жаңа өрісінің
есігін ашқан Ахмет Жұбановтың 100 жылдық
мерейтойларында да адам жаны мен білімін байытатын тамаша баяндамаларды да
осы Әбіш Кекілбаев жасап, қалың елдің алғысына
кенелді. Тараздың
2000 жылдық қарсаңында жарық көрген “Талайғы
Тараз”, Махамбеттің 200 жылдығына жазылған “Шандоз”,
биыл жазда “Егемен Қазақстанға” шыққан “Тіл және
Тәуелсіздік” сияқты шығармалардың әрқайсысы
біздің қоғамымыздың бүгінгі сұранысы,
ертеңнің асыл дүниелері. Әбекең
– саясаткер, мемлекеттік қызметкер, қайраткер ретінде Нұрсұлтан
Назарбаевтың ең сенімді лауазымды адамдарының бірі.
Парламенттің құрамында Әбіш Кекілбаевтай тұлғаның
болуы – ең алдымен елдігіміздің жақсы нышаны, мемлекеттік
қызметкерлерге құрмет, Парламентке абырой, қоғамға
қажет, елге медет.
|