Д е р е к т е р |
Қ а з а қ м а т е м а т и к т е р і |
Қазақстан Республикасы
Президентінің Жарлығы Ғылым мен техника саласындағы
Қазақстан Республикасының 2009 жылғы Мемлекеттік
сыйлығын беру туралы Қазақстан
Республикасының ғылым мен техника саласындағы мемлекеттік
сыйлығын беру жөніндегі комиссияның ұсыныстарын қарап,
қаулы етемін: 1. Ғылым
мен техника саласындағы Қазақстан Республикасының
2009 жылғы Мемлекеттік сыйлығы мына авторларға: 3) “Еркін алгебралардың автоморфизмдері
мен ішкі алгебралары” жұмысы үшін: Л.Н.
Гумилев атындағы Еуразия ұлттық университеті алгебра және
геометрия кафедрасының меңгерушісі, физика-математика ғылымдарының
докторы, профессор Уалбай Үтмаханбетұлы Өмірбаевқа берілсін. 2.
Осы Жарлық қол қойылған күнінен бастап қолданысқа
енгізіледі. Қазақстан Республикасының Президенті Н.НАЗАРБАЕВ. Астана, Ақорда, 2009 жылғы қарашаның 9-ы. № 885 СЕРПІНДІ ЖҰМЫСТАРҒА — ҒЫЛЫМ МЕН ТЕХНИКА САЛАСЫНДАҒЫ
МЕМЛЕКЕТТІК СЫЙЛЫҚ Қазақстан Республикасы Президентінің 2009 жылғы
9 қарашадағы №885 Жарлығына сәйкес 11 жұмыстан
таңдалып алынған үш
жұмысқа ғылым мен техника саласындағы
Мемлекеттік сыйлық берілді. “Автоморфизмдер
және еркін алгебралардың ішкі алгебралары” атты жұмысы үшін
Л.Н.Гумилев атындағы Еуразия ұлттық университетінің
алгебра және геометрия кафедрасының меңгерушісі,
физика-математика ғылымдарының докторы, профессор Өмірбаев
Уалбай Үтмаханбетұлы Қазақстан Республикасының
Мемлекеттік сыйлығының иегері болды. Автордың
осы тақырып бойынша жарық көрген ғылыми еңбектерінің
тізімі – 36. Мәтіннен
үзінді алу индексі АҚШ, Еуропа елдерінде, Қытай, Жапония,
ТМД және басқа да елдерде жарияланған 424 қайнар көзге
ие. Аталған
жұмысқа 19 пікір жазылды, оның 17-сін шетел (АҚШ,
Жапония, Франция, Болгария, Бразилия, Аргентина, Швейцария, Германия, Ресей) ғалымдары
жазған. У.Ү.Өмірбаевтың
Нагата және Кон есептері бойынша зерттеу жұмысының нәтижесі
жоғары бағаланып, математика салаларын әрі қарай
зерттеуде жаңа бағыттар ашып, әлемдік математиктердің
назарын аударды. 1972 жылы жапон математигі Нагатаның қойған,
көп жылдан бері шешілмей жүрген, “қолды” және
“жабайы” автоморфизмдер туралы есебі толық шешімін тапты. У.Ү.Өмірбаев
осы саладағы зерттеулерін жалғастыра отырып, 2004 жылы Кон
есебінің шешімін тапты. Нагата
және Кон есептерінің шешімі туралы жарық корген У.Ү.Өмірбаевтың
еңбектері үшін 2007 жылы оған Америка Математика қоғамының
жоғары дәрежелі Мур сыйлығы берілді. Оның
еркін шешімді Ли алгебрасы және еркін ассоциативті алгебралар үшін
енгізу проблемасы, еркін Ли алгебрасының және еркін Пуассон
алгебрасының автоморфизмдері туралы еңбектері мамандар арасында
жоғары бағаланды. НАГАТА ЖҰМБАҒЫН
ШЕШКЕН ҚАЗАҚ «Сыр бойы» газеті
2009-11-27
12:08:53 Бүгінгі таңда Қазақстанның математика ғылымы
саласындағы жетістіктері туралы көптеп айтылуда. Еліміздің
жас математиктері көптеген халықаралық білім сайыстарында
жоғары жетістіктермен көзге түссе, көш бастаған
профессор-ғалымдарымыз тың ғылыми жаңалықтарымен
әлемдік қауымдастықты таңғалдырып, қазақ
халқын қуантып жүр. Солардың бірі - Американың
математикалық қоғамының жоғары дәрежелі
«Мур» сыйлығының иегері, ҚР білім саласының құрметті
қызметкері, Лев Гумилев атындағы Еуразия ұлттық
университетінің Алгебра және геометрия кафедрасының меңгерушісі,
профессор Уалбай Өмірбаев. Ол өзінің еңбекқорлығы мен тапқырлығы
арқасында еркін алгебрадағы Кон және Каргаполов сынды
белгілі ғалымдар қойған математикалық мәселелерді
шешіп қана қоймай, 30 жылдан бері шешілмей келген жапон
математигі Нагата проблемасының түйінін тапты. Әл-Фараби
атындағы Қазақ ұлттық университетінің
Математика және механика бойынша ғылыми-зерттеу институтының
директоры Нарғозы Данаевтың айтуынша, қолданбалы ғылымның
даму тарихында осы саланың корифейлері үнемі белгілі бір
математикалық проблемаларды қойып келген. Себебі, осы
проблемаларды шешу арқылы математика ғылымы ілгері басып, тың
зерттеулерге жол ашылды. Мәселен, XX ғасырдың белгілі неміс
математигі Давид Гильберт 17 бірдей математикалық проблеманы алға
тартты. Оларды шешудің арқасында математика ғылымының
құрылымы түбегейлі өзгеріп, дифференциалды теңдеулер
теориясын ары қарай дамытуға мүмкіндік туды. «Еліміздің
маңдайалды математигі Уалбай Өмірбаевтың әлемдік математика
ғылымына қосқан үлесін осымен барабар деуге әбден
болады», - дейді Н.Данаев. 1972 жылы жапонның атақты ғалымы Нагата құрастырған
есепке Уалбай Өмірбаев өткен ғасырдағы 80-жылдардың
соңында білек сыбана кірісіп, он жылдың ішінде аталған
математикалық проблеманың түйінін тарқатты. Бас
кезіндегі ғалымның қуанышы ұзаққа созылмады.
Есептің шешімін қайта-қайта тексергеннен кейін, жауаптың
дұрыс емес екендігіне көзі жетті. Алайда, бетінен қайтпады.
Екі жылдың ішінде-ақ Нагата есебінің толық шешуін
тапты. Сол үшін қазақстандық ғалым 2007 жылы
Американың математикалық қоғамының жоғары
дәрежелі «Мур» сыйлығына ие болды. «Нагата есебі шешілді!» дегенді естіген кезде шетелдік ғалымдардың
көбісі сенбеді. Ал «Нагата есебін шешкен қазақтың жас
ғалымы» деген сөзге мүлдем құлақ асқан
жоқ. Осыдан кейін Уалбай Өмірбаев өзінің ұстазы
Шестаков екеуі сан алуан халықаралық конференциялар мен ғылыми
мәжілістерде өз жұмыстарын қорғауға
кірісті. Гонконгте өткен ғылыми форумда ол бірнеше сағат
бойы аяғынан тік тұрып, өз шешімін дәлелдесе де,
шетелдік әріптестері міз бақпады. Қазақ ғалымын
бір-ақ адам мұқият тыңдады. Атақты математик
Макар Лиманов орнынан атып тұрып, тақтадағы есепке жүгірді.
Оны қайта-қайта тексеріп:«Нақты және соңғы
жауап осы, бұдан басқа жауаптың болуы мүмкін емес!»,
деп айқайлап жіберді. Осыдан кейін барлық математиктер Уалбай Өмірбаевқа:«Есептің
ана жерін қалай, мына жерін қалай шештің? Соны дәлелдеп
бер!» деп үздіксіз хат жазумен болды. Қазақтың маңдайалды
математигі жауап жазудан жалыққан жоқ. Бір жыл өткеннен
кейін ғана қазақ ғалымы тапқан Нагата жұмбағының
шешімін барша әлем мойындады. Оның осы саладағы зерттеу еңбегіне
арналған ғалымдардың пікірі 50 бетке дейін барып,
математика саласындағы беделді халықаралық басылымдардың
бірі - Американың математикалық қоғамының
арнайы журналында жарық көрді. Ағылшын тілін еркін меңгерген қазақ ғалымы қазіргі
кезде АҚШ-тың Детроит қаласында дәріс оқып жүр.
Шетелдік жоғары оқу орындарында дәріс беріп жүрген
кезде ол жас математиктердің «Бұл - Нагата жұмбағын
шешкен қазақ азаматы» деген мадақты жиі еститін көрінеді. Әділ ДАРХАН. |